9 Parilaksanan Dane Yusup Nylametang Jagate
Dane Israel Polih Genah Becik ring Mesir
9
Risampune dane Israel mirengin sekancan pabesen dane Yusupe,
tur dane nyingak taler kreta-kreta sane kautus olih dane Yusup,
irika raris manah danene liang.
Raris dane Israel mataki-taki jagi luas ka Mesir.
Tur dane sareng soroh sentanannyane luas nuju Mesir.
Ring pemarginnyane,
dane sareng sami simpang ring wawidangan Bersyeba.
Irika dane Israel ngaturang aturan ring Sang Hyang Tunggal sane kasembah olih bapannyane.
Kaceritayang mangkin,
rikala wengi dane Israel polih sabda saking Sang Hyang Tunggal.
Ida ngandika sekadi puniki,
“Yakub,
Yakub!”
Raris dane Israel matur sekadi puniki,
“Inggih Ratu.”
Salanturnyane Sang Hyang Tunggal ngandika sekadi puniki,
“Nira ene Sang Hyang Tunggal ane kasembah olih bapan ceninge.
Eda ja cening jejeh ngalahin negerine ene,
negeri ane janjiang Nira tekening bapan ceninge buat luas ka Mesir.
Nira bakal nadiang soroh sentanan ceninge dadi bangsa ane gede ditu.
Nira bakal nyarengin cening ka Mesir lan bakal makta buin soroh sentanan ceninge mabalik ka negerine ene.
Yusup kal ada di sisin ceninge tatkala cening mati.”
Raris dane Israel mamargi saking Bersyeba luas nuju Mesir.
Dane sareng soroh sentanannyane luas negakin kreta sane kautus olih dane Yusup saking Mesir.
Ipun sami makta sekancan arta brana lan ubuh-ubuhannyane sane polihin ipun ring negeri anak Yahudi.
Raris dane Israel sareng soroh sentanannyane rauh ring Mesir.
Dane Israel ngutus okannyane inggih punika dane Yehuda mangda tangkil ring dane Yusup,
makta orti indik bapannyane sampun rauh ring wawidangan Gosyen.
Raris dane Yusup luas ka Gosyen.
Ritatkala dane Yusup matemu sareng bapannyane,
jeg pramangkin dane Yusup ngelut bapannyane tur sue pisan dane nangis sambilanga tetep ngelut bapannyane.
Raris dane Israel ngraos kapining dane Yusup sapuniki,
“Nah jani,
bapa suba siaga mati krana bapa suba matemu ajak cening tur ningalin cening enu idup.”
Raris dane Yusup ngraos kapining para semetonnyane sapuniki,
“Tiang bakal tangkil ring sang raja Mesir,
apanga ngaturin piuning unduk bapa lan nyaman-nyaman tiange suba neked uli negeri anak Yahudi.
Tiang bakal matur indik geginan ragane makejang tuah dadi para pengangon biri-biri lan sampi.
Lan sekancan ubuh-ubuhane ajak arta branane suba kaaba mai.
Rikala sang raja ngamanggil ragane mangda tangkil ring ida tur mataken,
‘Napi geginan ragane?’
Matur ja tuah ragane para pengangon,
ane miara ubuh-ubuhan uling cerik patuh buka para leluhur iragane imalu.
Ento apanga ragane makejang kicen tongos di wawidangan Gosyen.”
Dane Yusup ngraos sapunika krana anak Mesir marasa nista yening masawitra sareng pangangon.
Raris dane Yusup ngajak lalima semetonnyane taler bapannyane mangda tangkil ring ajeng sang raja Mesir.
Dane Yusup matur piuning ring sang raja Mesir indik sapangrauh bapa lan para semetonnyane.
Tatkala sang raja nakenang indik geginan ipune sami,
dane matur yening ipun sami para pangangon biri-biri lan sampi.
Krana prentah sang raja Mesire punika,
raris dane Yusup ngicen genah meneng lan tanah sane paling becik dados druen bapan lan para semetonnyane.
Lan dane Yusup tetep ngicenin lakar ajeng-ajengan sane genep ring bapannyane miwah sekancan soroh sentanan bapannyane.
Anak Mesir Polih Ajengan Saking Dane Yusup
Kaceritayang mangkin,
masan sayahe ngangsan ageng,
punika mawinan anak Mesire lan anak Yahudine pada lesu nandang seduk.
Lan sebilang ipun sami numbas gandum ring dane Yusup,
dane munduhang jinahe sane kaanggen naur gandume punika,
raris kaaturang ring sang raja Mesir.
Risampune jinah anak Mesir lan anak Yahudine pada telas,
raris rauh panjak Mesir tangkil ring dane Yusup tur matur sapuniki,
“Duh ratu,
icen ja titiang ajengan,
mangdane titiang sami nenten mati.
Jinah titiange sampun telas.”
Raris dane Yusup ngraos sapuniki,
“Yening ragane tusing ngelah pipis,
serahang ja makejang ubuh-ubuhan ragane.
Tiang bakal ngemaang ajengan apanga dadi pasilur ubuh-ubuhan ragane.”
Dane Yusup ngicen ipun sami ajengan apanga dados pasilur ubuh-ubuhan sane sampun kaserahang ring dane Yusup.
Risampune liwat tibane punika,
sekancan panjak Mesire rauh ring dane Yusup tur matur sekadi puniki,
“Duh ratu,
jinah tur ubuh-ubuhan titiange sampun telas kaserahang ring iratu.
Titiang nenten madue napi-napi malih,
sajabaning tanah lan dewek titiange kamanten.
Sane mangkin,
tumbas ja titiang lan tanah titiange sami,
mangdane titiang sami nenten mati ring arep iratu.
Tur titiang pacang dados panjak ngayahin sang prabu Mesir tur tanah titiange dados druen idane.”
Dane Yusup ngicen gandum dados ajengan lan bibit mangda katandur ring pategalan ipune.
Lan apahlima saking asil pategalane punika musti kaaturin ring sang raja.
Raris sekancan panjak Mesire matur kapining dane Yusup sekadi puniki,
“Ratu sampun nylametang titiang sami,
sane mangkin titiang ngaturang penyuksma ring iratu.
Titiang las manah dados panjak mangda ngayahin sang prabu Mesir.”
Sekadi asapunika dane Yusup ngicen genah becik dados druen bapan lan para semetonnyane.
Tur dane pada nylametang sekancan panjak Mesir saking bencana masan sayah sane ageng punika.